Allt sprakk í veislu sem Beckham-fjölskyldan var í um áramótin þegar Ron Dennis, fyrrum liðstjóri og stofnandi McLaren liðsins í Formúlu 1, var með frekju og yfirgang.

Forsaga málsins er sú að Beckham hjónin voru mætt til Maldíveyja til að fagna áramótunum ásamt vinum sínum, Gordon Ramsey og fjölskyldu hans.

Mikill vinskapur er milli fjölskyldnanna og þetta er ekki í fyrsta skipti sem þær eyða hátíðum saman. Gleðin fór fram á lúxushótelinu One & Only Reethy Rah á Maldív-eyjum og stóð mikið til þar sem skemmtiatriði kvöldsins voru ekki af verri endanum. Bæði ætlaði Cruz Beckam, ellefu ára sonur Beckham-hjónanna, að koma fram og það sama átti við um Victoriu Beckham sem ætlaði að flytja Spice Girls-smellinn 2 become 1 með Mel C.

Ron Dennis var einnig á svæðinu ásamt 30 manna fylgdarliði og var að sögn viðstaddra með frekju og yfirgang. Reyndi hann á einum tímapunkti að stelast í sæti sem Beckham var með og voru gestir úr hans hópi staðnir að því að skipta um borðamerkingar.

Þessi hegðun fór verulega fyrir brjóstið á David Beckham sem er þekktur fyrir töluverða skapsmuni þó að hann fari vel með það. Kom til hressilegra orðaskipta þar sem Dennis æpti að hann mætti þetta alveg, hann hefði borgað mest fyrir miðana. Allt róaðist þó fljótlega niður og skemmtanahöldin fóru vel fram.

Á Dennis að hafa beðist afsökunar daginn eftir.

Mikil mildi þykir að Gordon Ramsey varð ekki reiður því sjónvarpskokkurinn frægi er þekktur fyrir rosalega skapsmuni sem hefðu mögulega sett veisluhöldin á hliðina.