Undanfarin ár hafa Sofia Vergara og fyrrverandi unnusti hennar, Nick Loeb, tekist á um tvo frysta fósturvísa sem búnir voru til meðan samband þeirra stóð. Ætlunin var að láta staðgöngumóður ganga með barnið, eða börnin, en bæði undirrituðu Vergara og Loeb samning sem fól í sér að fósturvísarnir yrðu ekki notaðir án samþykkis beggja aðila.
Frétt mbl.is: Vergara tjáir sig um fósturvísana
Loeb hefur undanfarin tvö ár reynt að fá forræði yfir fósturvísunum og segir hann að samkvæmt trú sinni hafi líf þegar kviknað. Þá segir hann jafnframt að skuli fósturvísarnir verða áfram á ís jafngildi það því að drepa þá.
Vergara hefur þurft að standa í ströngu undanfarin ár, en samkvæmt frétt TMZ hefur hún nú farið fram á að dómari bindi endi á forræðisdeiluna og hreinlega banni Loeb að halda baráttu sinni áfram.
Samkvæmt dómsskjölum fer hún einnig fram á skaðabætur vegna málaferlanna.