Heimildamynd um Lady Gaga var nýverið tekin til sýninga á Netflix. Þar fjallar söngkonan á opinskáan hátt um baráttu sína við vefjagigt, en undanfarin ár hefur hún þjáðst af miklum verkjum vegna sjúkdómsins. Þá þurfti hún að aflýsa fyrirhuguðu tónleikaferðalagi sökum veikindanna.
Frétt mbl.is: Neyðist til þess að fresta tónleikum
Lady Gaga á þó góða að en poppdrottningin sjálf, Beyoncé Knowles, sendi henni pakka og heillaskeyti á dögunum. Lady Gaga, sem heitir réttu nafni Stefani Germanotta, var að vonum hæstánægð með hugulsemi Beyoncé.
„Er ekki að upplifa góðan dag, hvað verki varðar. Takk elsku B fyrir að senda mér þessa þægilegu íþróttapeysu. Hún heldur á mér hita hér úti í hengirúminu þannig að ég get verið meðal trjánna, himinsins og sólarinnar þar sem ég get dregið djúpt andann. Mér finnst ég svo lánsöm að upplifa svona mikla ást,“ skrifaði söngkonan við færslu á Instagram.
Lady Gaga greindi einnig frá því í heimildamyndinni að hún óttaðist að geta ekki eignast börn í framtíðinni, sökum sjúkdómsins. Hún er þó hvergi af baki dottin, og hyggst halda í tónleikaferðalag í byrjun næsta árs.
Frétt mbl.is: Óttast að geta ekki eignast börn
A post shared by xoxo, Gaga (@ladygaga) on Sep 26, 2017 at 9:00am PDT