Bandaríska leikkonan Naya Rivera hefur verið ákærð fyrir heimilisofbeldi en hún var handtekin á heimili sínu. Rivera er þekktust fyrir leik sinn í söngleikjaþáttunum Glee.
Lögregluþjónar ræddu við eiginmann Rivera, Ryan Dorsey, en hann sagði þeim að Rivera hefði slegið hann þar sem þau voru á gangi með syni þeirra.
Samkvæmt erlendum fjölmiðlum sýndi Dorsey lögregluþjónunum myndskeið úr farsíma sem á að sýna þegar hann er laminn í höfuðið og vörina.
Rivera var færð fyrir dómara vegna málsins en neitaði að tjá sig um málið við blaðamenn á staðnum.
Rivera og Dorsey eiga tveggja ára gamlan son en þau gengu í hjónaband fyrir þremur árum síðan. Fregnir bárust af því að þau væru að hætta saman í fyrra en þau ákváðu nýlega að halda sambandinu áfram.