Breski tónlistarmaðurinn Chris Rea hné niður á miðjum tónleikum í Oxford í gær. Rea er þekktastur fyrir lag sitt Driving Home for Christmas. Hann er 66 ára.
Í frétt Sky-sjónvarpsstöðvarinnar segir að ástand hans sé nú stöðugt.
Tónleikagestur segir að Rea hafi virst óstöðugur á sviðinu. Hann hafi m.a. reynt að taka utan um míkrófóninn, þegar nokkuð var liðið á tónleikana, en ekki tekist. Hann hafi að lokum fallið aftur fyrir sig og hafi steinlegið á gólfinu.
Rea fékk heilaáfall í fyrra en var farinn að koma fram aftur. Tónleikagestir segja að allt hafi virst vera í lagi þar til um miðbik tónleikanna.
Frekari fréttir af heilsu hans hafa ekki borist.
Hér að neðan má heyra vinsælasta lag Rea.