Karlotta prinsessa hóf leikskólagöngu sína í gær, mánudag. Karlotta virtist vera nokkuð spennt fyrir fyrsta deginum þegar móðir hennar smellti af henni myndum í Kensingtonhöll áður en lagt var af stað.
Karlotta, sem verður þriggja ára í maí, fékk vistun í Willcocks Nursery School en eins og mbl.is hefur áður greint frá er leikskólinn mun dýrari en venjulegur leikskóli á Íslandi.
Karlotta var nánast spariklædd þegar Katrín tók myndina en hertogaynjan er lunkinn ljósmyndari og tekur iðulega myndir af börnum sínum sem fara síðan í birtingu.