Gospelsöngvarinn Edwin Hawkins er látinn, 74 ára að aldri. Hawkins var án efa þekktastur fyrir gospel-slagarann „Oh Happy Day“. Þá var hann einnig mikill frumkvöðull í gospeltónlist og var hann titlaður sem einn af feðrum nútíma-gospeltónlistar.
Hawkins lést á heimili sínu í Pleasanton, Kaliforníu. Hann hafði barist við briskrabbamein í þó nokkurn tíma, að sögn almannatengils sem Washington Post vísar í.
Hawkins ólst upp í Oakland í Kaliforníu ásamt sjö systkinum. Hann var tónskáld, hljómborðsleikari, útsetjari og kórstjórnandi. Hann byrjaði ungur að koma fram með fjölskyldunni sinni og ýmsum hópum í kirkjunni.
Fyrsta platan hans, „Let Us Go into the House of the Lord“, kom út árið 1968 og var einungis hugsuð fyrir áheyrendur í næsta nágrenni. Þegar útvarpsstöðvar í nágrenni San Francisco hófu að spila áttunda lag plötunnar, Oh Happy Day, var hins vegar ekki aftur snúið. Lagið var gefið út í nýrri útgáfu árið 1969 í flutningi Dorothy Combs Morrison og seldist í milljónum eintaka.
Hawkins vann til fernra Grammy-verðlauna á ferli sínum.