Kim Kardashian og Kanye West eignuðust heilbrigða litla stúlku í gær, 14. janúar. TMZ greinir frá. Kim hefur einnig greint frá tíðindunum á heimasíðu sinni.
Stúlkan er þriðja barn hjónanna en ólíkt fyrri tveimur meðgöngum gekk staðgöngumóðir með stúlkuna. Fyrir eiga þau dótturina North, fjögurra ára, og soninn Saint, eins árs.
Læknar ráðlögðu Kim að nýta sér staðgöngumóður ef hún ætlaði að eignast fleiri börn, sem hún gerði. Ferlið hefur hins vegar verið langt frá því að vera auðvelt. „Allir þeir sem segja eða halda að þetta sé bara auðvelda leiðin hafa rangt fyrir sér. Mér finnst mun erfiðara að fara í gegnum þetta á þennan hátt af því að þú hefur enga stjórn,“ sagði Kim í viðtali við ET í nóvember.
Kardashian segist hafa hatað að vera ólétt sjálf og hélt að í þetta sinn yrði þetta auðvelt. Hún hafði hins vegar rangt fyrir sér, þrátt fyrir að hún hafi valið staðgöngumóður sem hún treysti. Hún hefði viljað ganga sjálf með barnið ef hún gæti.