Á morgun hefst forsala miða á Þjóðhátíð í Eyjum og nú hafa fyrstu listamennirnir sem koma fram verið staðfestir. Rappararnir Jói Pé og Króli eru meðal þeirra sem koma fram á stóra sviðinu í Herjólfsdal um verslunarmannahelgina. Páll Óskar Hjálmtýsson mun einnig koma fram á Þjóðhátíð.
Fleira tónlistarfólk mun bætast í hóp þeirra sem koma fram á Þjóðhátíð á næstu dögum. Í tilkynningu frá hátíðinni segir að ein þeirra hljómsveita sem mun koma fram sé hljómsveit sem ekki hefur spilað lengi á hátíðinni en á sínum tíma hafi hljómsveitin verið langvinsælasta hljómsveit landsins og hún eigi eina mest seldu plötu allra tíma á Íslandi.