Grey Hil Mars og Academic komust áfram á fjórða undankvöldi Músíktilrauna sem fram fór í kvöld og tryggðu sér þar með sæti á úrslitakvöldinu sem fer fram á laugardag.
Grétar Hilmarsson er Grey Hil Mars. Grétar, sem er 25 ára, leikur á gítar og syngur, Hjörtur Geir Þorvarðarson, sem er 24 ára, leikur á bassa og Siguróli Valgeirsson, sem er 26 ára, leikur trommur. Grey Hil Mars er fæddur og uppalinn í bítlabænum Keflavík og hefur leikið með ýmsum hljómsveitum þar til nú að hann ákvað starfa undir eigin listamannsnafni og flytja eigin lög með hjálp frá vinum sínum.
Academic skipa fimm ungmenni úr mismunandi tónlistarskólum. Þau eru sautján og átján ára gömul og heita Kristín Sesselja Einarsdóttir, sem leikur á gítar og syngur, Heba Sólveig Heimisdóttir, sem leikur á rafgítar, Freyr Hlynsson, sem leikur á hljómborð, Gabríel Einarsson, sem leikur á trommur, og Jakob Fjólar Gunnsteinsson, sem leikur á bassa. Þau eru úr Reykjavík og Garðabæ.