Aðdáendur Britney Spears þekktu vart poppstjörnuna þegar hún var kynnt sem nýjasta fyrirsætan í herferð franska tískuhússins Kenzo á dögunum.
Á Twitter hefur fólk verið óhrætt við að gagnrýna myndvinnslu herferðarinnar og segja margir að þeir héldu fyrst að konan á myndunum væri söngkonan Jessica Simpson eða hreinlega Heidi Klum. Enn fleiri spurðu sig að því hvort það hefði ekki verið ódýrara fyrir Kenzo að teikna myndirnar í stað þess að breyta Britney svo mikið í myndvinnsluforritinu Photoshop.
Myndirnar voru teknar í Los Angeles af hinum virta ljósmyndara Peter Lindbergh og í samtali við Vogue sagði Britney að þó hún hafi skemmt sér vel í myndatökunni hafi það verið á sama tíma sérstök upplifun því almennt sé hún vön að taka myndir í litlum rýmum eða stúdíóum en þarna hafi hún verið stödd úti á götu og fáklædd en myndirnar hafi komið mjög vel út.
Hér fyrir neðan má sjá nokkrar myndir úr herferðinni.