Aníta Daðadóttir úr félagsmiðstöðinni Fönix sigraði í Söngkeppni Samfés sem fram fór í Laugardalshöll í dag. Aníta söng lagið Gansta og sigraði „hug og hjörtu allra“ að því er segir í fréttatilkynningu, en um 3.000 manns fylgdust með keppninni í Laugardalshöll.
Í öðru sæti var Benedikt Gylfason úr félagsmiðstöðinni Bústöðum með lagið Listen og í þriðja sæti var Elva Björk Jónsdóttir frá félagsmiðstöðinni Eden í Grundarfirði með lagið Thinking out loud.
Unnur Elín Sigursteinsdóttir frá félagsmiðstöðinni Öldunni í Hafnarfirði var valin bjartasta vonin og Emma Eyþórsdóttir flutti lagið Ég vil þig sem var valið besta frumsamda lag keppninnar.
Dómnefndin var skipuð þeim Aroni Hannesi Emilssyni, Degi Sigurðssyni, Hildi Kristínu Stefánsdóttur, Rögnu Björg Ársælsdóttur og Rakel Pálsdóttur.