Dolores O'Riordan, söngkona írsku rokksveitarinnar The Cranberries, lést sviplega hinn 15. janúar á hótelherbergi sínu í Lundúnum. Fyrr um daginn hringdi hún í vin sinn og skildi eftir skilaboð þar sem hún virkar mjög hress.
TMZ birti talhólfsskilaboð O'Riordan til vinar síns Dans Waties. O'Riordan byrjar á því að segja honum að hún sé í London og á hvaða hóteli hún er. Hún segir honum síðan að nýja útgáfan af Zombie með Bad Wolves sé frábær og hljómar spennt að fara í upptökuverið að taka upp tónlist.
Dánarorsök O'Riordan hefur ekki fengist staðfest en einhverjir hafa velt því fyrir sér hvort hún hafi svipt sig lífi, sérstaklega í ljósi þess að hún glímdi við þunglyndi. Söngkonan virðist þó allt annað en döpur í talhólfsskilaboðunum.