Norska ríkissjónvarpið (NRK) hóf á laugardag sýningar á nýjum unglingaþætti í anda Skam-þáttanna vinsælu. Nýju þættirnir heita Blank en sýningum á Skam, sem nutu fordæmalausra vinsælda, var hætt síðasta sumar.
Blank gerði ekkert boð á undan sér, þ.e. NRK hafði ekki auglýst þá fyrir fram.
Persónur Blank eru um nítján ára gamlar og fjalla þættirnir um líf ungmenna í menntaskóla. Aðalpersónurnar heita Susanne, Mats og Ella, segir á sérstökum vef NRK um þættina. Þar má fylgjast með samskiptum persónanna, rétt eins og þær séu raunverulegar.
Aðeins tvö stutt myndskeið hafa verið birt nú þegar en NRK segir að þeim verði safnað saman á hverjum sunnudegi í heilan þátt.