„Gengi Íslands í Eurovision hefur verið upp og ofan. Í ár mun Ísland ekki ná langt.“ Þannig hefst dómur um íslenska lagið í Eurovision í ár í breska blaðinu The Telegraph.
Lögunum 43 sem taka þátt í keppninni í Portúgal í byrjun næsta mánaðar er raðað upp og er íslenska atriðinu spáð neðsta sæti. Ari Ólafsson stígur á svið fyrir Íslands hönd í fyrri undankeppninni 8. maí þar sem hann flytur lagið Our Chocie.
Í umfjöllun Telegraph kemur fram að Ari hafi geðþekka rödd en lagið sjálft sé alls ekkert sérstakt. Tilvalið sé að setja upp te þegar Ari stígur á svið.
Hinni ísraelsku Nettu er spáð sigri og Tékkanum Mikolas Josef öðru sæti.