Streymisveitan Spotify hefur fjarlægt lög rapparans R. Kelly af lagalistum sínum sem mælt er með við notendur. R. Kelly hefur ítrekað verið sakaður um kynferðislega misnotkun en fyrir skömmu hvöttu svartar konur innan hreyfingarinnar Time´s Up tónlistariðnaðinn til að grípa til aðgerða gegn honum.
Lög Kelly verða enn aðgengileg á Spotify en streymisveitan mun ekki lengur gera þau áberandi fyrir hlustendur. „Við viljum að lagalistarnir endurspegli gildi okkar,“ sagði talsmaður Spotify í samtali við BBC.
Ákvörðun Spotify kemur í kjölfar nýrrar stefnu um hatursefni og hatursfulla hegðun [Hate Content and Hateful Conduct].
Fjöldi kvenna, innan Time´s Up og herferðarinnar #MuteRKelly, hafa hvatt plötufyrirtæki Kellys og streymisveitur til að gefa hann upp á bátinn. Þær hafa einnig krafist þess að tónleikum hans verði aflýst.
Kelly var sýknaður árið 2008 af ákæru um að hafa barnaklám í fórum sínum eftir fréttaflutning um myndband sem var sagt hafa sýnt hann í kynlífsathöfnum með stúlku sem var undir lögaldri.
Fyrr í þessum mánuði lagði kona fram kæru til lögreglunnar um að Kelly hafi viljandi smitað hana af kynsjúkdómi. Samband þeirra hófst þegar hún var 19 ára.
Einnig var greint frá því í fyrra að Kelly hefði heilaþvegið sex konur, lokað þær inni á heimili sínu og neytt þær til kynmaka við sig.