Breska hljómsveitin The Chemical Brothers hefur boðað komu sína til Íslands og mun koma fram á einum tónleikum í Laugardalshöll 20. október.
Þetta kemur fram í tilkynningu frá Hr. Örlygi.
The Chemical Brothers er flestum tónlistarunnendum vel kunn enda hefur hún starfað frá árinu 1989. Sveitin hefur gefið út 6 breiðskífur sem allar hafa ratað á toppinn á breska vinsældalistanum.
The Chemical Brothers eru brautryðjendur á sviði raftónlistar en hafa þá sérstöðu innan þeirrar tónlistarstefnu að ná jafnt til aðdáenda hefðbundinnar rokktónlistar sem danstónlistar, að því er segir í tilkynningunni. Einnig kemur þar fram að tónleikar sveitarinnar séu mikið sjónarspil.
„Tónleikagestir í Laugardalshöll munu fá allan pakkann því The Chemical Brothers koma hingað með öll sín tæki og tól til að byggja upp sem magnaðasta upplifun fyrir íslenska aðdáendur,“ segir í tilkynningunni.
Tónleikarnir fara fram í Laugardalshöll laugardaginn 20. október.
Miðasala fer fram á Tix.is og hefst hún 19. júní kl. 10.