Rapparinn Travis Scott, kærasti Kylie Jenner, á erfitt með sviðsljósið sem fylgir Kylie. Ofurparið prýðir forsíðu GQ í ágúst og segir Kylie að Travis líki ekki að vera svona mikið í sviðsljósinu. Sjálfur er hann nokkuð þekktur rappari, en athyglin sem hann fær úti á götu er ekki í hálfkvisti við athyglina sem kærasta hans fær.
Þau hafa ekki sést mjög mikið úti, á körfuboltaleikjum eða úti að borða, og það er ekki tilviljun. Þau reyna eftir fremsta megni að vera ekki í sviðsljósinu saman. Fyrrverandi mágur Kylie, Scott Disick, hefur talað um „Kardashian-bölvunina“ sem hrellir þá sem eru í samneyti með fjölskyldunni. Hann segir að þeim systrum fylgi drama sem eigi það til að elta þá sem hafa umgengist fjölskylduna. Kylie segist vera að aflétta bölvuninni með því að halda Travis frá sviðsljósinu.