Wolfram Morales framkvæmdastjóri þýsku Sparkassen-bankanna og Annette Seiltgen óperusöngkona gengu í það heilaga á Siglufirði í síðustu viku. Greint er frá brúðkaupinu á fréttavefnum Trölli.is.
Morales er mögulega einhverjum Íslendingum kunnur. Árið 2016 kom hann til landsins og talaði um samfélagsbanka á málþingi Dögunar um efnið, en Morales stýrir þýska samfélagsbankanum Sparkassen, sem er net svæðisbundinna banka þar í landi. Sparkassen-bankar hafa hátt í 50% markaðshlutdeild í Þýskalandi.
Á vef Trölla segir að hjónin hafi ákveðið að gifta sig á Íslandi, þar sem marga mánuði geti tekið að fá fógeta til að gifta sig í á þeirra heimaslóðum. Upphaflega ætluðu þau að láta pússa sig saman í Reykjavík, en þar reyndist biðin eftir sýslumanni lengri en þau höfðu áætlað.
„Gegnum kunningsskap fréttist af því að á Siglufirði væri hægt að gifta sig hjá sýslumanni með stuttum fyrirvara. Það var því ákveðið að slá til og fara í skemmtiferð til Siglufjarðar og gifta sig í leiðinni,“ segir á vef Trölla.