Aretha Franklin mjög veik

Hin 76 ára gamla Aretha Franklin er mjög veik og liggur inni á spítala í Detroit í Bandaríkjunum. Þetta staðfestir blaðamaðurinn Roland S. Martin, vinur söngkonunnar. Hann segir fjölskyldu og vini hennar vera hjá henni á sjúkrahúsinu. Ekki hefur verið gefið út hvaða veikindi Franklin glímir við.

Franklin hefur verið veik síðustu mánuði og hefur þurft að aflýsa tónleikum. Í mars síðastliðnum aflýsti hún öllum tónleikum sem hún hafði verið bókuð á. Hún kom síðast fram með Elton John í New York í nóvember 2017. 

Í viðtali í fyrra sagðist hún ætla að setjast í helgan stein á árinu 2018 hvað varðar tónleikaferðalög en ætlaði að koma fram stöku sinnum. Hún hefur þó ekki komið fram á árinu heilsunnar vegna. 

Aretha Franklin á tónleikum í Washington D.C. í Bandaríkjunum árið 2013. AFP

• Blogga um frétt