Útvarpsmaðurinn Rikki G, eða Ríkharð Óskar Guðnason, ætlar að hlaupa 10 kílómetra í Reykjarvíkurmaraþoni Íslandsbanka á laugardaginn næstkomandi. Rikki ætlar að hlaupa í kleinuhringjabúningi, en vinir hans kalla hann stundum kleinuhring. Þá hefur Shake&Pizza í Egilshöll hannað shake til heiðurs Rikka, sem ber nafnið Kleinuhringurinn.
Rikki ætlaði að hlaupa 3 kílómetra í skemmtiskokkinu en vegna fjölda áskorana ætlar hann að hlaupa 10 kílómetra.
Það er kannski réttara að segja vegna áskorana frá áhrifamiklum mönnum en landsliðsmennirnir Aron Einar Gunnarsson og Aron Pálmarsson hafa heitið drjúgum upphæðum á Rikka, og hvatt hann til þess að hlaupa 10 kílómetra. Rikki hleypur til styrktar Ljónshjarta, sem eru samtök sem styrkja ungt fólk á aldrinum 20-50 ára sem misst hefur maka sinn.
Hendi i reply frekar.. richard!! Skottastu 10km og eg styrki hlaupid thitt og thar af leidandi Ljónshjarta
— Aron Einar (@ronnimall) August 12, 2018
Aron Pálmarsson hefur heitið 100 þúsund krónum á Rikka og ætlar Aron Einar Gunnarsson að styrkja félagið um 150 þúsund krónur. Þá hefur fjölmiðlamaðurinn Egill Einarsson einnig heitið 50 þúsund krónum á hann.