Fyrrverandi ríkisstjóri Kaliforníu, leikarinn og líkamsræktarfrömuðurinn Arnold Schwarzenegger, hefur endurheimt bikarinn sem hann vann í keppninni Herra heimur árið 1969.
Schwarzenegger hreppti titilinn Herra heimur árið 1969 og fékk bikar að launum. Hann geymdi bikarinn heima hjá mömmu sinni, sem síðar gaf aðdáanda hans bikarinn án þess að segja Schwarzenegger. Þannig týndist bikarinn og hefur verið týndur síðan þá.
Schwarzenegger fékk orð af bikarnum nýlega þegar hann var í líkamsræktarstöð í Búdapest í Ungverjalandi. Eigandi líkamsræktarstöðvarinnar kom honum í samband við meistara í bekkpressu að nafni Lorand Berke. Í ljós kom að Berke var aðdáandinn sem fékk bikarinn í hendurnar frá mömmu Schwarzenegger. Berke kom bikarnum í hendur Schwarzenegger sem staðfesti að um hinn upprunalega bikar var að ræða.