Safnplata með bestu lögum hljómsveitarinnar The Eagles er orðin mest selda plata allra tíma, samkvæmt nýjum lista samtaka bandarískra plötuútgefenda.
The Eagles: Their Greatest hits 1971-75, sem inniheldur bestu lög fyrstu fjögurra platna sveitarinnar hefur selst í 38 milljónum eintaka og veltir þar með Thriller með Michael Jackson úr sessi. Hún hefur selst í 33 milljónum eintaka.
Safnplatan var lengi vel í efsta sætinu en missti Thriller fram úr sér árið 2009 eftir lát Jackson.
Hotel California, plata The Eagles frá árinu 1976 með samnefndu smáskífulagi, er í þriðja sæti á listanum með 26 milljónir seldra eintaka.
Tekið var bæði mið af sölu platna í föstu formi og sem streymi.