Leikstjórinn Danny Boyle hefur hætt við að leikstýra næstu kvikmynd um spæjarann James Bond. Samkvæmt tilkynningu á Twitter-síðu Bond-myndanna í dag kemur fram að Boyle hafi ákveðið að hætta vegna ágreinings, segir frétt BBC. Til stendur að hefja tökur á kvikmyndinni í desember.
Boyle, sem er þekktastur er fyrir að hafa leikstýrt myndinni Trainspotting, átti að leikstýra nýrri Bond-mynd sem yrði 25. myndin um 007.
Tilkynningin um ákvörðun Boyle kom í kjölfar yfirlýsingar framleiðendanna Michael G. Wilson og Barbara Broccoli ásamt leikaranum Daniel Craig um að listrænn ágreiningur hafi átt sér stað og að Boyle hætti vegna þessa.
Líklega mun myndin sem um ræðir verða sú síðasta sem Craig leikur í, en samningur hans nær til fimm mynda. Áður hefur hann haft hlutverk Bond í myndunum Casino Royale, Quantum of Solace, Skyfall og Spectre.
Michael G. Wilson, Barbara Broccoli and Daniel Craig today announced that due to creative differences Danny Boyle has decided to no longer direct Bond 25. pic.twitter.com/0Thl116eAd
— James Bond (@007) August 21, 2018