Aðdáendur U2 voru að vonum vonsviknir þegar tónleikum hljómsveitarinnar var aflýst í Berlín í gær vegna raddleysis söngvarans, Bono. Sveitin hafði flutt nokkur lög þegar Bono bað áhorfendur afsökunar og sagði: „Ég held að við verðum að hætta. Þetta er ekki boðlegt.“
Þeim sem voru á tónleikunum á Mercedes-Benz-leikvanginum var sagt að um stutt hlé væri að ræða en skömmu síðar að tónleikunum væri aflýst. Bono hét því að U2 myndi skipuleggja aðra tónleika í staðinn.
BBC hefur eftir einhverjum gestum að Bono hafi sagt að ástæðan fyrir raddleysinu væri reykvélarnar við sviðið.
Í tilkynningu frá U2 kemur fram að Bono hafi verið frábæru formi og röddin í fínu lagi fyrir tónleikana og hljómsveitin hlakkað til að hefja leik en um aðra tónleika U2 í Berlín hafi verið að ræða. En eftir nokkur lög hafi Bono gjörsamlega misst röddina. Ekkert amaði að á tónleikunum kvöldið áður.
Tónleikarnir á föstudagskvöldið voru þeir fyrstu í Evrópuferðalagi U2, Experience + Innocence. Bono var að syngja lagið Red Flag Day þegar röddin gaf sig.
Frá flutningi lagsins í Berlín í gærkvöldi