Sofandi „katta-afi“ vinsæll á samfélagsmiðlum

Ljósmyndir af eldri borgara sem fær sér kríu með köttum í kattathvarfi í Green Bay í Wisconsin njóta nú mikilla vinsælda á samfélagsmiðlum. Hafa myndir af Terry Laurmen brætt hjörtu netverja, sem hafa látið rigna inn fjárgjöfum til athvarfsins að andvirði um 40.000 dollara.

Laurmen er meðal sjálfboðaliða í Safe Haven-kattaathvarfinu í Green Bay. Athvarfið er skipulagt eins og kaffihús, með hægindastólum á víð og dreif og myndefni frá fuglastöðinni í stöðugri sýningu. Athvarfið, sem hefur verið starfrækt frá 2016, sérhæfir sig í að finna ný heimili fyrir fatlaða ketti og ketti með sérþarfir sem annars ættu á hættu að vera svæfðir.

Laurmen, sem er spænskukennari á eftirlaunum, mætir nær daglega í athvarfið með sérstakan bursta sem hann notar til að kemba kettina. Þar sem hann er mikið á ferðalögum hefur hann ekki getað eignast sinn eigin kött en nýtur þess að vera með þeim í athvarfinu.

„Þeir þekkja hann allir og þegar hann kemur inn hlaupa þeir á móti honum, af því að þeir vita að hann er með burstann og nammi. Þeir hrúgast yfir hann, nudda sér utan í hann og bara elska hann,“ segir Elizabeth Feldhausen, stofnandi athvarfsins.

Þar sem það tekur hins vegar á að kemba 20-30 ketti, fær Laurmen sér stundum blund og aðrir sjálfboðaliðar fóru að taka myndir af síðdegisblundi hans með köttunum. Færsla með myndunum var síðan birt á Facebook fyrir stuttu og hefur nú verið deilt víða.

Í dýraathvarfinu kalla menn Laurmen gjarnan „katta-afann“, nafn sem hann kann vel að meta. Hann er hins vegar ekki alveg búin að meðtaka nýfundna frægð sína á samfélagsmiðlum.

„Ég vissi að fólk í nágrenninu kynni að meta þetta, en ég vissi ekki að þetta myndi fara víðar,“ segir Feldhausen. „Þegar ég sagði honum hve margir hefði séð myndirnar varð hann virkilega glaður.“

• Blogga um frétt