Vilja bjóða unglingum á Lof mér að falla

Tillaga bæjarfulltrúa D-lista um að bjóða unglingum í 9. og 10. bekk grunnskóla Árborgar á kvikmyndina Lof mér að falla var samþykkt á bæjarráðsfundi á föstudag.

Ljóst er að boðið myndi vera liður í forvarnarstarfi sveitarfélagsins en í fundargerðinni segir m.a.: „Það er skoðun okkar að gott væri að hluti okkar framlags í vímuvörnum hjá Sveitarfélaginu Árborg væri að bjóða 9. og 10. bekkingum grunnskóla Árborgar á kvikmyndina „Lof mér að falla“ sem sýnd er í Selfossbíói um þessar mundir.“

Þá segir í fundargerðinni að boðið á myndina þyrfti að vinna í góðu samstarfi við foreldra og forráðamenn og skólayfirvöld svo vel takist til.

Innlegg í vímuvarnarmál

Eins og þeir tugir þúsunda Íslendinga sem hafa séð myndina vita byggist myndin á sönnum atburðum og snýst um hræðilegar raunir táningsstelpu sem gengur í fyrstu vel í skóla en leiðist út í heim harðra fíkniefna. Telur bæjarráð myndina vera gríðarlega áhrifaríka og að hún geti verið innlegg í vímuvarnarmál Árborgar.

Bæjarráð hefur falið bæjarstjóra og íþrótta- og menningarfulltrúa að vinna málið áfram.

Úr myndinni Lof mér að falla.

• Blogga um frétt