Veröld/Fólk | mbl | 14.10.2018 | 12:30 | Uppfært 15.10.2018 9:59

Hrundi í gólfið í Eldborg

Selma Björnsdóttir er dómari í Jólastjörnunni í ár. mbl.is/Eggert Jóhannesson

Selma Björnsdóttir söngkona segir að jólastjarnan í ár verði að syngja frá hjartanu. Selma er í dómnefnd í Jólastjörnunni sem sýnd verður í Sjónvarpi Símans en í þáttunum keppa krakkar 14 ára eða yngri um að fá að syngja með fremsta tónlistarfólki landsins í Hörpu fyrir jól.

Sjálf segist Selma hafa sungið mikið sem barn. „Ég kem frá mjög söngelskri fjölskyldu. Pabbi spilaði á gítar og við systur sungum með. Ég kom fyrst fram og söng einsöng þegar ég var sjö ára þá lék ég Álfadísina í Öskubusku.

Spurð að því hvort hún verði stressuð þegar hún komi fram segir Selma það misjafnt. „Stundum er ég sultuslök og stundum alveg að farast úr stressi. Ég hef aldrei náð að losa mig við stressið. Bara tek því að það sé komið og reyni að vera ekki hrædd við það.“

„Ég hrundi í gólfið í Eldborg á ABBA-tónleikum fyrir framan 1.500 manns og náði í leiðinni að beygja mækastand í 90 gráður í fallinu. Fékk stærsta marblett lífs míns á sköflunginn við fallið,“ segir Selma þegar hún er spurð hvort hún muni eftir einhverju fyndnu sem hefur komið upp á á sviði

Hvaða jólalag er í uppáhaldi?

„River með Joni Mitchell. Einfaldlega frábær melódía og texti.“

Hvaða hæfileikum þarf jólastjarnan að búa yfir?

„ Hún þarf að syngja frá hjartanu, koma textanum til skila, njóta þess að flytja lagið fyrir okkur og vera í jólaskapi,“ segir Selma að lokum.

Skráningu í Jólastjörnuna lýkur á miðnætti laugardaginn 20. október. Tólf krakkar verða í kjölfarið boðaðir í prufur og sigurvegarinn verður svo afhjúpaður í lokaþætti Jólastjörnunnar hjá Sjónvarpi Símans.

Aldurstakmark: 14 ára og yngri.

Skilyrði: Allir þátttakendur þurfa leyfi forráðamanna.
Dómnefnd: Björgvin Halldórsson, Selma Björnsdóttir, Svala Björgvinsdóttir og Jóhanna Guðrún Jónsdóttir.

Stjórnandi þáttarins: Gunnar Helgason.

Ef þú vilt taka þátt þá getur þú skráð þig HÉR.