Söngkonan Ariana Grande og grínistinn Pete Davidson eru sögð hafa slitið trúlofun sinni en parið trúlofaði sig í byrjun sumars eftir stutt samband. TMZ greindi frá sambandsslitunum í gærkvöldi.
Heimildarmenn segja parið hafa hætt saman um helgina. Tímasetningin mun ekki hafa verið rétt fyrir þau. Þau segjast elska hvort annað enn þá en rómantíski hluti sambandsins er hins vegar búinn.
Grande og Davidson greindu frá trúlofun sinni í júní á þessu ári en fréttir af sambandi þeirra bárust aðeins nokkrum vikum fyrr. Árið hefur verið köflótt hjá Grande en í september lést fyrrverandi kærasti Grande, rapparinn Mac Miller.