Knattspyrnuhetjan David Beckham opnar sig um hjónaband sitt og Victoriu Beckham í áströlskum sjónvarpsþætti samkvæmt The Sun. Viðtalið hefur enn ekki birst en í auglýsingu fyrir það segir hann að hjónabandið geti reynst erfitt.
„Að hafa verið gift jafnlengi og við höfum, það er alltaf erfitt,“ sagði Beckham þegar minnst var á næstum því 20 ára langt hjónaband hans og Victoriu Beckham. „Það verður aðeins erfiðara.“
Hjónin eru mikið í kastljósi fjölmiðla og segir hann þau reyna að vernda börn sín frá fjölmiðlum. Sögusagnir um skilnað þeirra heyrast reglulega nú síðast í sumar. Síðan þá hafa bæði David og Victoria tjáð sig um hjónabandið en fatahönnuðurinn og fyrrverandi kryddpían tjáði sig um samband þeirra í viðtali við Vogue fyrir nokkrum vikum.
„Við áttum okkur bæði á því að við erum sterkari saman en sem einstaklingar,“ útskýrði frú Beckham í viðtalinu. „Myndi annað okkar vera í þeirri stöðu sem við erum nú í ef við hefðum ekki hist eða verið saman í öll þessi ár?“