Meghan Markle, hertogaynjan af Sussex, átti í mestu erfiðleikum með að halda aftur af hlátrinum þegar hún fylgdist með sýningu skóladrengja á Suður-Kyrrahafseyjunni Tonga í dag.
Drengirnir voru klæddir einkennisbúningum og fluttu lag um moskítóflugur og stigu nokkur vel valin dansspor með. Það vakti kátínu hertogaynjunnar sem táraðist af hlátri en reyndi eins og hún gat að stilla sig. Harry Bretaprins gekk ögn betur að hemja hláturinn en glotti út í annað líkt og sjá má á eftirfarandi myndskeiði breska ríkisútvarpsins:
Harry og Meghan eru í 16 daga opinberri heimsókn í Eyjaálfu og var heimsókn þeirra til Tonga liður í henni. Heimsókninni lýkur í næstu viku á Nýja-Sjálandi.