Satanistahofið í mál við Netflix

Stytta Satanic Temple af geitaguðinum Baphomet var búin til sem ...
Stytta Satanic Temple af geitaguðinum Baphomet var búin til sem hluti af herferð samtakanna fyrir trúfrelsi.

Aðgerðasinnarnir í Satanic Temple hafa höfðað mál gegn Netflix og Warner Bros fyrir að gera eftirlíkingu af styttu samtakanna af geitaguðinum Baphomet fyrir sjónvarpsþáttaröð um táningsnornina Sabrinu. BBC greinir frá.

Krefst hópurinn, sem ekki trúir á ofurnáttúrulegan Satan heldur leitast við að „hvetja til góðmennsku og samhygðar meðal manna“, 50 milljóna dala í bætur fyrir athæfið. Það samsvarar um sex milljörðum króna.

Í málshöfðuninni, sem lögð var fyrir dómstól í New York í gær, kemur fram að líkneski svipað Baphomet-styttunni birtist í fjórum þáttum af sjónvarpsþáttaröðinni The Chilling Adventures of Sabrina. Hefur einn stofnenda Satanic Temple, Lucien Greaves, birt mynd af styttunum tveimur á Twitter.

Framleiðslufyrirtækin tvö hafa neitað að tjá sig um málið, en sjónvarpsþáttaröðin segir frá ævintýrum táningsins Sabrinu Spellman, sem er að hálfu leyti mennsk og að hálfu leyti norn. Þættirnir byggja á samnefndri teiknimyndasögu, sem einnig var innblásturinn að sjónvarpsþáttum um táningsnornina Sabrinu sem sýndir voru í sjónvarpi á árabilinu 1996-2003.

Í nýju þáttunum sjást persónur tilbiðja „hinn myrka herra“, eða Satan, og stunda mannát. Segir Satanic Temple félagsmenn með þessu vera tengda við „illum óvini“.

Greaves staðfesti að hópurinn hefði höfðað mál gegn framleiðendunum fyrir að „eigna sér einkaréttarvarið minnismerki okkar til að auglýsa þeirra eigin asnalega skelfingar satanista skáldskap“.

Stytta Satanic Temple af geitaguðinum var búin til sem hluti af herferð samtakanna fyrir trúfrelsi, sem bæði „viðbót og mótsögn“ við minnismerki um boðorðin tíu í Oklahomaborg.

mbl.is