Lundúnalögreglan hefur nú handtekið karlmann sem grunaður er um þjófnað í Blackpool. Beiðni lögreglu um aðstoð almennings náði mikilli útbreiðslu á samfélagsmiðlum, eftir að lögregla deildi mynd úr eftirlitsmyndbandi af hinum grunaða, sem reyndist nauðalíkur bandaríska leikaranum David Schwimmer, sem fór með hlutverk Ross í sjónvarpsþáttunum um Vini.
BBC segir lögregluna í Lancashire nú hafa greint frá því að hinn meinti tvífari Ross hafi verið handtekinn í Southall í vesturhluta Lundúna, grunaður um þjófnað. Hún hafði áður sagt frá því að búið væri að bera kennsl á manninn, eftir að fjöldi ábendinga barst frá almenningi vegna málsins.
Tilkynnti lögregla um handtökuna á Twitter-síðu sinni á mánudag og þakkaði þá Schwimmer sérstaklega fyrir stuðning hans, en leikarinn sendi frá sér grínmyndband eftir að leitin að tvífaranum hófst þar sem hann lýsti yfir sakleysi sínu.
Happy to help @LancsPolice #IllBeThereForYou
— Metropolitan Police (@metpoliceuk) November 13, 2018
https://t.co/4hup1FUsVX
Maðurinn er grunaður um að hafa stolið jakka, farsíma og veski á veitingastaðnum Mr. Basrai í Blackpool 20. september. Hann sást síðar á eftirlitsmyndavél halda á bjórkassa í verslun í bænum.