Raunveruleikastjarnan Rob Kardashian og barnsmóðir hans, fyrirsætan Blac Chyna, hafa átt í miklum illdeilum síðan þau slitu sambandi sínu. Þrátt fyrir ríkidæmi sitt krefst Chyna hárra upphæða í meðlagsgreiðslur og er nú svo komið að Kardashian býr hjá mömmu sinni, Kris Jenner.
Hinn 31 árs gamli Kardashian leitast nú eftir að borga minna meðlag en þau komust á sínum tíma að samkomulagi að hann myndi greiða Chyna 20 þúsund Bandaríkjadali, um tvær og hálfa milljón, á mánuði með hinni tveggja ára gömlu Dream.
The Blast komst í ný dómsskjöl þar sem Kardashian segir Chyna vera ríka og hún hafi eyðilagt fyrir honum atvinnu sína. Hann hætti á samfélagsmiðlum í kjölfar þess að Chyna sótti um nálgunarbann á hann. Hann hætti líka að vinna með hinum ýmsu fyrirækjum sem borguðu honum fyrir vinnu á samfélagsmiðlum.
Sokkafyrirtæki hans gekk mjög illa eftir að samfélagsmiðlanotkunin hætti og keypti móðir hans, Kris Jenner, helmingshlut í fyrirtæki hans. „Ég á ekki lengur heimili. Ég bý heima hjá móður minni,“ segir Kardashian í skjölunum.