Þriðja Sex and the City-myndin verður líklega aldrei gerð þar sem leikkonan Kim Cattrall vill ekki taka þátt í henni. Í nýjum hlaðvarpsþætti sem Vanity Fair greinir frá kemur fram hver söguþráður myndarinnar átti að vera.
Átti Mr. Big, persónan sem leikarinn Chris Noth lék í sjónvarpsþáttunum og myndunum tveimur, að deyja. Hann átti að deyja eftir hjartaáfall í sturtu. Noth segir í hlaðvarpsþættinum að hann hafi ekki verið hrifinn af fyrstu tveimur myndunum en þriðja myndin hljómaði vel. „Ég heyrði að handritið væri afbragð,“ sagði leikarinn.
Er því haldið fram að dauði Mr. Big sé ein af ástæðunum fyrir því að Cattrall vildi ekki vera með. Átti hann að deyja snemma í myndinni og því hefði myndin snúist að miklu leyti um hvernig Carrie, persóna Söruh Jessicu Parker, jafnaði sig eftir fráfallið.