Gott er á milli Roberts gamla Plant, sem frægastur er fyrir að hafa sungið með Led Zeppelin, og fyrrverandi eiginkonu hans, Maureen Plant. Alltént tróð söngvarinn upp í sjötugsafmæli hennar í Bretlandi á dögunum.
Ekki voru þó Zeppelin-lög á efnisskránni, heldur Elvis og meiri Elvis, One Night With You, Little Sister og A Big Hunk O' Love.
Skötuhjúin skildu árið 1983 og leitaði Plant þá ekki langt yfir skammt, tók saman við og barnaði systur Maureen, Shirley.
Plant náði sjálfur þeim áfanga fyrr á þessu ári að verða sjötugur og lýsti því þá yfir að ólíklegt væri að Zeppelin kæmi saman á ný.