Ungfrú heimur kemur frá Filippseyjum

Ungfrú Filippseyjar var valin ungfrú heimur (Miss Universe) í Bangkok í nótt en keppnin markaði ákveðin tímamót þar sem í fyrsta skipti keppti transkona í keppninni. 

Catriona Gray, 24 ára, hafnaði í fyrsta sæti en fulltrúi Suður-Afríku var í öðru sæti og Venesúela í því þriðja. Bandaríski grínistinn Steve Harvey og fyrirsætan Ashley Graham voru kynnar á keppninni. 

Gray var ákaft fagnað þegar hún lýsti störfum sínum í fátæktarhverfum höfuðborg Filippseyja, Manila, og ummælum hennar um að hún myndi reyna gera sitt til þess að styðja þá sem þyrftu á hjálp að halda færi hún með sigur af hólmi var vel tekið. Hún myndi vilja starfa þar sem neikvæðni fengi ekki dafnað og börn væru með bros á vör.

Í keppninni þurftu keppendur að svara ýmsum spurningum svo sem varðandi fjölmiðlafrelsi, lögleiðingu kannabis, flóttafólk og #MeToo.

Ungfrú Spánn, Angela Ponce, er fyrsta transkonan sem tekur þátt í keppninni en Miss Universe-keppnin var eitt sinn í eigu forseta Bandaríkjanna, Donald Trump. Eitt af því sem hann kom í gegn eftir að hann varð forseti var að banna transfólki að ganga í bandaríska herinn.

„Ég hef alltaf sagt að það að vera með sköp breytti mér ekki í konu. Ég er kona, var það áður en ég fæddist því sjálfsvitund mín er hér,“ sagði Ponce í viðtali við AFP-fréttastofuna á laugardag og benti á höfuð sitt.

Katrín Lea Elenu­dótt­ir var fulltrúi Íslands í keppninni.