Í upphafsatriði kynningarmyndbands fyrir teiknimyndina Frozen 2 er ísprinsessan Elsa stödd á strönd, sem margir velta nú fyrir sér hvort byggi á svörtum sandi Reynisfjöru. Í atriðinu virðir Elsa úfnar öldurnar fyrir sér og tekur svo af sér bæði skó og slá og hleypur út í sjóinn. Sem ævintýraprinsessa nær Elsa að hlaupa ofan á öldunum og sigrast þannig á krafti hafsins.
Fjallað er um atriðið á ferðavefnum Guide to Iceland Now og bent á að þetta sé nákvæmlega sú hegðun sem gestir í Reynisfjöru séu varaðir við. Staðurinn sé illræmdur sem ein af hættulegustu ströndum Íslands.
Þó að Frozen 2 rati ekki í kvikmyndahús fyrr en í lok nóvember á þessu ári eru engu að síður ýmsir forsvarsmenn íslenskra ferðaþjónustufyrirtækja sagðir farnir að hafa áhyggjur af að kynningarmyndbandið muni hvetja ferðamenn til að sýna af sér glannaskap í ferð sinni í fjöruna.