Leikarinn Jussie Smollett hefur verið klipptur út úr síðustu tveimur þáttunum af fimmtu seríu af þáttunum Empire. Þetta kemur fram í tilkynningu frá framleiðendum þáttanna.
Smollett hefur verið ákærður fyrir að ljúga til um árás en hann segist hafa orðið fyrir árás í lok janúar vegna hörundslitar síns og kynhneigð sinnar.
Lögreglan í Bandaríkjunum segir að hann hafi skipulagt árásina til þess að reyna að fá hærri laun.
Framleiðendur þáttanna segja í tilkynningunni að Smollett hafi verið mikilvægur hluti af leikarahópi Emipre síðustu ár og þeim þyki vænt um hann. Þau segja ásakanirnar vera óhugarlegar en þau ætli að treysta dómskerfinu til að ákveða hvað er rétt og hvað er rangt.
Smollett hefur farið með eitt af aðalhlutverkunum í þáttunum Empire síðan 2015. Í gær lýsti samstarfsfólk hans yfir að þau vildu að hann yrði skrifaður út úr þáttunum sem fyrst, en þau telja að hann hafði brugðist trausti þeirra og rýrt orðspor þáttanna.