Logi og Hulda slógu á þráðinn til Jóhannesar Hauks á bolludaginn undir dagskrárliðnum Hvað er í matinn? Hann vonaðist til að krakkarnir myndu láta sér bollur bolludagsins nægja í kvöldmatinn, enda hafði hann lagt metnað í tvær tegundur, meðal annars vatnsdeigsbollu hjúpaða stökku og bragðgóðu „craquelin“. Hann var þó með mörg járn í eldinum er þau náðu í hann því hann var einnig á fullu í búningagerð fyrir öskudaginn.
Hann byrjaði að vinna með vatnsdeigsbollubaksturinn á fimmtudag í síðustu viku segir hann og í fyrstu var hann að fást við hið algenga vandamála með að bollurnar „falli“. En þá fékk hann ráð frá góðum félaga sínum og Norðurlandameistara í bakstri, Sigurði E. Baldvinssyni. Jóhannesi leiðist ekki að leita ráða hjá slíkum meistara og Sigurður ráðlagði honum að baka bollurnar bara lengur en uppskriftin segði til um. Þannig að 20-25 mínútur reyndust ekki nóg og hann fór að ráðum Norðurlandameistarans og leyfði þeim að bakast þar til þær voru orðnar vel gullinbrúnar. „Ef þú bakar þær ekki nóg þá falla þær,“ segir Jóhannes og það er lærdómur þessa árs í bollubakstrinum segir hann.
Spurður út í næstu verkefni segist hann halda til Prag í Tékklandi til að taka upp miðaldadramaseríu sem framleidd verður fyrir Netflix og ber heitið „A Letter for the King,“ upplýsir hann, eða „Bréf til konungsins“. „Þannig að ég verð með sverð á hesti og svona,“ upplýsir Jóhannes Haukur léttur í bragði og einmitt á fullu að undirbúa Hatarabúninga fyrir krakkana fyrir öskudaginn, þar sem golf-tí áttu að nýtast sem gaddar og iðnaðargrímur voru notaðar ásamt beltum og ólum úr skápnum líkt og sjá má.
Hér má hlusta á viðtalið í heild.