Beckham féll fyrir hrekk Cordens

Breski þáttastjórnandinn James Corden gabbaði á dögunum samlanda sinn fótboltakappann David Beckham með því að láta útbúa styttu af kappanum, sem átti töluvert sameiginlegt með mislukkuðum skúlptúrum af þeim Ronaldo og Mohammed Salah, sem vakið hafa mikið umtal aðdáenda.

Beckham sjálfur virðist þó hafa húmor fyrir gabbinu, því hann vekur athygli á hrekknum á Facebook-síðu sinni. Segir hann Corden hafa náð að blekkja sig fullkomlega og birtir með hlekk í YouTube-myndband af þessum umsvifamikla og ítarlega hrekk.

Corden fékk m.a. til liðs við sig forsvarsmenn LA Galaxy, bandaríska liðsins sem Beckham lék með, og lét útbúa styttu í meira en fullri stærð af fótboltakappanum með teygðu andliti, stórum rassi og óvenjulöngum handleggjum sem Beckham virtist lítast verulega illa á. „Það eina sem er í lagi er hárið,“ sést Beckham segja við leikarann sem dulbúinn hafði verið sem myndhöggvarinn sem vinnur að gerð raunverulegrar styttu sem LA Galaxy ætlar að reisa af Beckham við leikvang sinn.

• Blogga um frétt