Leikkonan Rosario Dawson hefur staðfest þær sögusagnir að hún sé í sambandi með bandaríska þingmanninum Cory Booker. Slúðurmiðillinn TMZ náði tali af Dawson á flugvelli í gær þar sem hún staðfesti sögusagnirnar. Hún sagði að sambandið væri dásamlegt og að Booker væri dásamleg manneskja.
Dawson er þekkt fyrir ýmis hlutverk í gegnum tíðina en hún lék í Josie and the Pussycats, Rent, Men In Black II og Sin City. Þá hefur hún einnig talað fyrir marga karaktera í teiknimyndum. Hún leikur nú í sjónvarpsseríunum Luke Cage á Netflix.
Booker er þingmaður New Jersey í öldungadeild bandaríska þingsins, hann hefur einnig gefið kost á sér til forvals demókrata til forsetakosninganna 2020. Ef allt gengur vel hjá þeim Dawson og Booker gæti Dawson því hugsanlega verið næsta forsetafrú Bandaríkjanna.