Hin sænska Alicia Vikander vann til Óskarsverðlauna árið 2016. Ferill Vikander sem varð þrítug í fyrra byrjaði þó ekki vel og var hún búin að skrá sig í lögfræðinám þegar hún sló í gegn í Sviþjóð árið 2010.
Í viðtali við Harper's Bazaar viðurkennir Vikander að hafa fundist hún ekki eiga heima í leiklistarbransanum eftir að hafa verið hafnað þrisvar um inngöngu í leiklistarskóla. Vikander þurfti greinilega ekki að fara í neinn leiklistarskóla þar sem hún vann stór sænsk verðlaun fyrir hlutverk í sænsku myndinni Pure árið 2010.
Vikander segist stundum gleyma hvað fylgir því að vera orðin Hollywood-stjarna. Hún giftist hinum írska Michael Fassbender árið 2017 og er ekki á samfélagsmiðlum. Hjónin búa í Portúgal þar sem þau synda í sjónum. „Ég ólst upp í mjög köldu, dimmu landi og Portúgal er andstæðan.“