Tökur á norsku þáttaröðinni Ragnarök, sem framleidd er af streymisveitunni Netflix, standa nú yfir í Odda í Noregi. Gísli Örn Garðarsson fer með hlutverk í þáttaröðinni og er hann í góðum félagsskap Skam-stjarna sem Íslendingar ættu að vera vel kunnugir. Þeirra á meðal er David Alexander Sjøholt sem fór með hlutverk Magnusar í þáttaröðunum vinsælu.
Þá fer Emma Bones einnig með hlutverk í þáttunum, en hún fór með hlutverk dóttur Helenu Mikkelsen í þáttunum Heimebane sem sýndir voru á RÚV fyrir skömmu.
Ragnarök eru leiknir á norsku og koma fjölmargir þekktir norskir leikarar við sögu í þáttunum og sem dæmi má nefna Henriette Steenstrup, Odd-Magnus Williamson, Synnøve Macody Lund, Lína Verndal, Fridtjov Soheim og Bjørn Sundquist.
Við gerð norsku þáttaraðarinnar hefur Netflix fengið í lið með sér Adam Price, höfund dönsku þáttanna Borgen. Þættirnir Ragnarök munu fjalla um norrænt goð sem hefur endurholdgast sem nútímatáningur og gerast þættirnir að miklu leyti í norskum framhaldsskóla.
Ragnarök er liður í átaksverkefni Netflix sem felst í að auka framleiðslu á evrópsku sjónvarpsefni á öðrum tungumálum en ensku. Þá er streymisrisinn einnig að fara eftir reglugerð Evrópusambandsins sem sett var í fyrra sem kveður á um að að minnsta kosti 30% efnis á streymisveitum þurfi að vera af evrópskum uppruna.
Þættirnir verða sex talsins og verða aðgengilegir á Netflix síðar á árinu.