Vona að Rómeó og Júlía fjölgi sér

Vatnafroskarnir Rómeó og Júlía tóku stórt skref í vikunni þegar Júlía flutti inn í fiskabúr Rómeós. Vísindamenn binda miklar vonir við að froskarnir muni fjölga sér og bjarga þannig sehuencas-vatnafroskategundinni frá útrýmingu.

Rómeó hafði verið makalaus í um áratug, allt þar til Júlía fannst djúpt í iðrum frumskógarins í Bólivíu í janúar. Til stóð að þeirra fyrsta stefnumót yrði á Valentínusardaginn, en það frestaðist örlítið á meðan vísindamenn gengu úr skugga um að ekki stafaði sýkingarhætta af Júlíu. Skæð sýking hefur herjað á tegundina og nánast útrýmt henni.

Rómeó og Júlía hittust fyrst 1. mars og hefur sambandið gengið eins og í sögu. „Rómeó hefur verið voða ljúfur við Júlíu, fylgt henni eftir í búrinu og fórnað ormunum sínum í máltíðir fyrir hana,“ segir Teresa Camacho Badani, forstöðumaður skriðdýra­deild­ar Nátt­úru­m­inja­safns Bóli­víu.

Hún segir að það sé yndislegt að fylgjast með Rómeó í góðum félagsskap eftir að hafa verið einsamall svo árum skiptir. Nú á hins vegar eftir að koma í ljós hvort mökunarferlið gangi eftir.

„Það er erfitt að segja til um hvað gerist næst því í raun vitum við lítið um æxlun þessarar tegundar. Við gætum þurft að bíða í nokkra daga eða vikur en við það gæti líka eitthvað farið að gerast mjög fljótlega,“ segir Christopher Jordan náttúruverndarsinni.

Vísindamenn og dýraverndunarsinnar binda miklar vonir við að Rómeó (til ...
Vísindamenn og dýraverndunarsinnar binda miklar vonir við að Rómeó (til hægri) og Júlía bjargi sehuencas-vatnafroskategundinni frá útrýmingu. AFP
mbl.is