Leikkonan Michelle Williams greindi frá því í viðtali við Vanity Fair síðasta sumar að hún væri að giftast og flytja inn með tónlistarmanninum Phil Elverum. Ekki er ár liðið en hjónin þó sögð vera hætt saman.
People er meðal þeirra fjölmiðla sem greindu frá skilnaðinum en fréttirnar bárust eftir að Williams sást án giftingarhringsins á opinberum viðburðum i tvígang. Eru hjónin sögð hafa hætt saman í byrjun árs eða um hálfu ári eftir að þau gengu í hjónaband. Eru þau sömuleiðs sögð hafa hætt saman í vinsemd.
Williams á dóttur með Heath Ledger heitnum og hefur hún verið dugleg að halda einkalífinu fyrir utan sviðsljósið. „Ég hef augljóslega aldrei í lífi mínu talað um samband en Phil er ekki bara einhver,“ sagði Williams í viðtalinu síðasta sumar. Sagði leikkonan hann elska sig á þann hátt sem hún vill lifa lífinu.