Framlag Íslands í Eurovision þetta árið hefur vakið umtalsverða athygli, ekki bara á samfélagsmiðlum, heldur líka í erlendum fjölmiðlum, en líkt og þekkt er orðið þá komst Ísland upp úr undanriðlinum í gær í fyrsta skipti frá 2015.
Breska ITV sjónvarpsstöðin er meðal þeirra miðla sem tekið hafa viðtal við Hatara og var birt viðtal við liðsmenn Hatara í morgunþættinum Good Morning Britain í morgun. Þar ræðir sjónvarpmaðurinn Richard Arnold við þá Klemens Hannigan og Matthías Tryggva Haraldsson um boðskap sveitarinnar um að hatrið muni hafa betur sameinist fólk ekki á friðsælan hátt.
Richard Arnold appears to have made some interesting new friends in Tel Aviv 😅Meet Iceland's entry Hatari. #Eurovision@richardAarnold | pic.twitter.com/IpGtful4aq
— Good Morning Britain (@GMB) May 15, 2019
Einar Hrafn Stefánsson, trommari Hatara, vakti þó ekki síður athygli Arnold, sem vakti máls á því að Einar væri sonur sendiherra Íslands í Bretlandi og vakti sú tenging greinilega kátínu sjónvarpsfólksins á settinu heima í Bretlandi.
Líkt og fleiri fjölmiðlamenn reyndi Arnold að fá hann til að tjá sig. „Ég held að öryggisorðið hans sé 12 stig,“ sagði Arnold er hann gafst upp.