„Ég mun halda minni stöðu þótt Instagram deyi á morgun,“ segir fatahönnuðurinn Michael Costello sem er frá sér numinn eftir að vera dæmdur fyrir Instagram-reikning sinn en ekki raunverulega velgengni í lífinu.
Michael Costello, sem er hönnuður fræga fólksins, hefur hannað kjóla fyrir Jennifer Lopez, Kim Kardashian West, Oprah Winfrey, Céline Dion, Toni Braxton, Suzanne Somers, Faye Dunaway og Florence Henderson svo fáeinir séu nefndir.
Oprah Winfrey er svo hrifin af honum að hún færði honum pizzu á eins árs afmæli verslunar hans í Los Angeles. Þetta kom fram á vefsvæði Oprah-tímaritsins í fyrra.
Þrátt fyrir þetta virðist Costello ekki eiga upp á pallborðið hjá ónefndu hóteli í Orlando sem vísaði honum frá þar sem hann væri ekki nógu „sterkur“ á Instagram.
Í umfjöllun sinni um þetta segir Costello m.a. að hann hafi verið í áfalli eftir að hafa fengið höfnun frá hótelinu. „Markaðsmanneskja hótelsins sagði að það væri af því að ég væri ekki með nógu mikið fylgi á Instagram og væri því ekki velkominn á hótelið.
Í fyrsta lagi fékk ég ekki tækifæri til að ræða hvað gistingin kostaði mig. Ég var svo sannarlega ekki að biðja um að fá gistinguna mér að kostnaðarlausu. Ég á erindi til Orlando og er með fjármuni til að eyða í þeirri ferð.
Í öðru lagi velti ég því fyrir mér hvenær við byrjuðum að verðmeta velgengni fólks á stöðu þeirra á samfélagsmiðlum?“
Hann segist ekki vera manneskja sem tali um verkefnin sín. „Ég er hins vegar mjög þakklátur fyrir velgengni mína og að ég hafi haft tækifæri á að vinna að vörumerki mínu frá því ég var fimmtán ára að aldri. Ég á feril sem nær út fyrir Instagram. Jafnvel þótt Instagram deyi á morgun, munu viðskipti mín blómstra áfram.
Ástríða mín er fólgin í því að láta alls konar konur upplifa sig fallegar. Mér þykir leitt að ég er ekki samfélagsmiðla-stjarna eða að gera fræðslumyndbönd í svefnherberginu mínu. Ekki svo að skilja að ég standi ekki með fólki sem er frægt á samfélagsmiðlum. En að hafna mér um hótel þar sem ég er ekki með nógu margar birtingar á samfélagsmiðlum, af því ég geri ekki förðunarmyndbönd á reikningi mínum er fáránlegt!
Það er ótrúlega sorglegt að búa í heimi sem þar sem fólk byggir ákvarðanir sínar á hversu margir bregðast við myndunum þínum á samfélagsmiðlum.“
Þess má geta að Michael Costello er með 1,4 milljónir fylgjenda á Instagram.