Þó að ekki megi með góðu móti fullyrða að ævintýri Hatara í Ísrael sé lokið, þar sem ljóst er að strik þeirra í beinni útsendingu í gær kann að draga dilk á eftir sér, eiga liðsmenn sveitarinnar ásamt allri áhöfn að vera mættir út í rútu við hótelið klukkan 6.30 í fyrramálið að ísraelskum tíma.

Þaðan er farið á flugvöllinn í Tel Aviv og ef gengið er út frá því að hópurinn komist klakklaust í gegnum flugvöllinn, flýgur hann heim á leið til Keflavíkur. Ekki er þó ljóst hvers er að vænta af ísraelskum yfirvöldum. Norðmaður sem var með Palestínufána á bakinu á meðan hann dansaði í atriði Madonnu var yfirheyrður í einn og hálfan klukkutíma á flugvellinum á leiðinni heim.

Og merkið á búningi dansarans var öllu látlausara en uppátæki Hatara.

Hér að neðan má lesa úr myndum ljósmyndara mbl.is frægðarsögu íslenska hópsins í Tel Aviv þetta árið. Sjón er enda sögu ríkari, jafnvel þótt sagan sjálf sé lygileg.