Parasite í leikstjórn Suður-Kóreumannsins Bongs Joon-hos hlaut Gullpálmann á kvikmyndahátíðinni í Cannes í ár. Í þessari mynd er saga fátækrar fjölskyldu sögð og hvernig líf hennar breytist eftir að sonurinn fer að kenna dóttur auðugs iðnjöfurs.
Myndinni er lýst sem „hryllingskenndum gamanleik“ sem setji sér það markmið að afhjúpa stéttaskiptingu í samfélaginu.
Bong Joon-ho er fyrsti Suður-Kóreumaðurinn til að hljóta Gullpálmann. Hann gerði garðinn frægan með Okja og Snowpiercer.
Okja var á Cannes 2017 en var þó frumsýnd á Netflix, sem er viðkvæmt á hátíðinni en var þó leyft.
Hin fransk-senegalska Mati Diop fékk þá „silfrið“, fyrir mynd sína Atlantics. Hún er fyrsta þeldökka konan til að vinna verðlaun sem leikstjóri í 72 ára sögu hátíðarinnar.
Athygli vakti þá að Quentin Tarantino gekk tómhentur út af hátíðinni.